Su progetu

In su panorama bastante mannu de s’interessu retzente pro s’istòria de sos motos antifeudales de fine Setighentos, su tziclu de manifestatziones intituladas “In sos logos de Angioy”, promòvidas dae s’Istitutu de istùdios e chircas “Camillo Bellieni” de Tàtari, est de colocare intre sas ideas prus originales e a siguru noas.

S’istrutura de s’eventu s’est semper articulada subra unos cantos puntos firmos. A su sèberu de una bidda, interessada dae su passàgiu de s’Alternos Giovanni Maria Angioy o comente si siat partètzipe, a vàriu tìtolu, in su bentu de sos acadessimentos rivolutzionàrios, sunt sighidas una sèrie de vìsitas in sos logos pro los istudiare e seberare sos percussos prus ammaliadores, chi aiant pòtidu mirare puru a sas produtziones locales, sas manifaturas o s’artisanadu, ultres che s’istòria, s’archeologia e s’istòria de s’arte. Posca s’istùdiu e sa chirca de sas provenièntzias (bibliogràficas e archivistas), s’iscritura de notas sintèticas chi costituiant una brochure minoredda de dare a sos partetzipantes. Sos artèfitzes de custa esperièntzia sunt istados Giuseppina Ruggiu, insegnante, laureada in archeologia preistòrica e protostòrica e ghia turìstica, Antonello Nasone, dotzente de Filosofia Polìtica, Stefano A. Tedde, archivista, laureadu in Benes Culturales e diplomadu in Archivìstica, Paleografia e Diplomàtica in s ’Archìviu de Istadu de Casteddu e Maria Laura Melas, giovane istudiosa de Archeologia.

Ogni sìngula atividade cun sos visitadores in su logu est istada marcada dae una presentatzione de s’eventu, curada dae su chi tando fiat su diretore iscientìficu de s’Istitutu Bellieni Michele Pinna, e dae una sèrie de contos, leturas, ispiegatziones e pro mèdiu de de s’istòria de cussa bidda, una de sas medas “ville” protagonistas de s’istòria locale. Sas escursiones de In sos logos de Angioy sunt incomintzadas su 26 de santugaine de su 2017, una domìniga frita e bentosa de fine atùngiu chi at bidu protagonistas sas biddas de Semèstene, Bonolva e su villàgiu oe sena niunu de Rebecu, e ant sighidu in su 2018 cun sos comunes de Tiesi, Turalva, Bessude e Cherèmule, Ossi, Macumere. S’annu a poi est istada partetzipe sa tzitade de Tàtari e sos comunes de Santu Lussurzu, Itiri Cannedu e Uri. A dolu mannu, sa situatzione pandèmica grave at custrintu a rinuntziare a àteros eventos favoressende però sa proposta de vìsitas e leturas virtuales pro mèdiu de sas piataformas freeware de messàgios istantàneos cun su tziclu “In sos logos de Angioy sul web”, propostu intre santugaine e nadale de su 2020.

Miras de su progetu “In sos Logos de Angioy”

Punnat a fàghere e a afortiare una rete de cooperatzione giamende a partetzipare a unu progetu cun organizatzione regionale, in prus de sa Regione Autònoma de sa Sardigna, sos comunes, sos assòtzios, sos entes, sas istitutziones e sas impresas presentes in sos territòrios interessados.

Cheret interessare sas realidades diferentes atraessadas dae su caminu sighidu dae Angioy, prima comente Alternos e a pustis comente rivolutzionàriu.

Valorizare sas resursas naturales e paesagìsticas de sos territòrios, chi chircat sas adesiones de sas populatziones locales e nde cheret rapresentare su bisòngiu e sa voluntade de apartenèntzia in prus de sas particularidades diferentes e cumplessas.

Cheret pònnere in evidèntzia sas ispetzifitzidades issoro in sa gastronomia, in sas limbas, in su cantu, in su ballu, in sa religione, in sas formas literàrias e su pro ite issoro, ùnicas in sos gèneres e in sas variedades diferentes issoro.

Sos territòrios chi sunt istados atraessados dae Angioy, aunidos a pare in su progetu, sunt destinados a fàghere paris unu caminu chi at a èssere s’aunione tra sas biddas de sa costera e cussas de s’internu.

Sos fatos de s’istòria, paris a cussos naturales de s’ìsula, ant a pòdere èssere unu motivu in prus pro cumbìnchere sos turistas a visitare sa terra nostra rica de ammajos e capatze de fàghere nàschere emotziones fortes.

Sa partetzipatzione a su progetu s’at a avalèssere de sos logos, de sos tzentros abitados, de sas crèsias, de sos logos de recreu, de sos logos de acoglièntzia, de sos giassos naturales, de sos giassos archeològicos e de sos museos.

Su progetu s’at a mudare in un’oportunidade esclusiva e caraterizante de memòria, de cultura, de connoschèntzia, de cuncàmbios materiales e immateriales.

Su progetu at a favorèssere s’acostu cun istòrias minores e mannas, totus càrrigas de umanidade, pro cunfigurare un’identidade fata dae prus elementos e cumplessa.